Der Trentin plaip an geln plòtz, ober s bart hom naia bècksln, mear streng ver za mòchen nèt zavil envire gea’ de krònket. Roat plòtz ver de gamoa’n va Castello Tesino, Padul ont Panait, as hom mear abia der drai prozent van lait as kronk sai’. S doi ist sèll as de nai schòff van president va de Provinz, Maurizio Fugatti, vour hòt ont as gilte ist va de sèchzena van òlderhaileng. “No van nazionaln technik kritern, finz hait, der Trentin plaip an geln plòtz – hòt er tsòk en vraita nomitto der president Maurizio Fugatti bail de videokonferenz pet de giornalistn – ober de sòchen sai’ noch za kemmen letzer, hait, laider, hòt s gahòt zbelf lait as sterm sai’ ont de lait as kriang de krònket sai’ òlbe mear. Ver dòss hom ber u’pfònk za hearn ens petn minister Speranza ver za paroatn a naia schòff rècht ver en Trentin, pet naia bècksln ver en gònze lònt ont iberhaup ver de gamoa’n va Castello Tesino, Padul ont Panait. Ber hom gaheart de pirgermoastern van doin drai gamoa’n ont ber hom en tsòk bos as ber noch sai’ za tea’. “