Der Covid19 hòt nèt augahòlten de sprochminderhaitn as se se dena pfuntn hom – en videokonferenz – ver za nemmen toal en de draiskste Konferenz van Sprochminderhaitn, an bichtegen moment ver an offetn trèff van òlla de politischn dersteller. En iber sèsk lait (amministratorn ont asesorn van Gamoa’n ont va de Tolgamoa’schòft va de minderhait, vourstea’ner van Kulturinstitutn, sakretarn van Tolgamoa’schòftn ont van Gamoa’n van sprochminderhaitn, referentn ont vourstea’ner van saitn van zaitungen ver de sprochminderhaitn ont van telebisionprogram, u’stelltn van sprochtirler as ibersetzn en de sproch va minderhait ont profesorn ont untersuacher va de Universitet va Trea’t as enteressiart sai’ ont as òrbetn avn doi tema) hom klòffen gameicht en mitta zobenz ver za klòffen va abia as stea’ de dinger as gatu’ kemmen sai’ ver za unterstizn ont schitzn de gschichtlegen minderhaitn en Trentin. Der President va de Autonome Provinz va Trea’t Maurizio Fugatti hòt u’pfònk de òrbetn ont hòt unterstrichen as “hait hom ber ens trèffen gamiast petn doi telematik vurm, ober ber hom u’ganommen za vinnen ens dena. Der doi ist aa an zoach van an be as geat envire ont as men nou òlbe òrbetn billt en doi bichtegen ont schlissl sektor ver de inser trentiner gamoa’schòft. Ver ins ist bichte envire trong projektn ont naia òrbetn ver za gem òlbe bèrt en de sprochminderhaitn asou as de kemmen nèt aloa’ galòk bou as de lem”. Ver dòs ist runt bichte der projekt gamòcht va Lusern va co-living, pet en zil as naia familie gea’ za stea’ bou as s hòt de zimber sprochminderhait.“S ist an vourprojekt – hòt er derklort der president Fugatti – as tauert viar jor ont as gep de moglechket ver òlla viara de jarder za zoln koa’ zins. S sai’ kemmen gamòcht òchtadraisk vrong va lait as kemmen van gònze Balschlònt ont va auslònt aa ver za belln gea’ za stea’ as de Altipiani Cimbri. S sai’ kemmen araustschauk òlla de vrong van an auskenneta kommission ver za verstea’ de belln lait as hom ensint za vongen u’ a lem en a pèrglònt abia Lusern, asou as men kònnt hom a social ont a birtschòft bòcks en dorf. An gruas ont an bintsch va guata òrbet ist kemmen gem v de Viareren van Dipartiment ver de òllgamoa’ ont mitòrbetn innrichtn Valeria Placidi ont va de Viarer van lokal sprochminderhaitn ont europeische audit Giuliana Cristiforetti