Ver de simsk jor va benn as storm ist der schraiber, en jor 1942, der Bersntoler Kulturinstitut, gèltsgott en paitrog va de Autonome Region Trentin Sudtirol, hòt organisiart a toal bichtega trèffn ver za denken as der ist gaben en Bersntol bail en jor 1915, benn as der ist kemmen en Palai abia untertenent van osterraichungarn kriager. De ausònder aussicht van Tol en òlla de dinger, s hòt en pariart schubet enteressant: de naturumbèlt van hoachen pèrng, de bisn ont de balder, de lait, s òrbetn va òll to, de haiser, de sproch as de hom klòfft ont de gschicht van gruam as hòt zoacht platz ont galòk gschichtn za kontarn. Pet sèll as der hòt autschrim as de topiacher, hòt er tschrim de gschicht Grigia as klòfft va Palai. De ist kemmen gadruckt en 1921. De ausstell hòt studiart de nètz as der Musil hòt gahòp pet en Tol, durch de sai'na tèckstn ont letrattn ont pilder as der gamòcht hòt bail der ist gaben en Tol. Kan Filzerhof en Vlarotz ist kemmen gamòcht aa a sait bou as der suacher as kimmp mu lisnen gschichter as klòffen van Musil ont as liablech sai'.

As de 12 van moi ist kemmen inngabichen aa a bonderer van schraiber Musil en Bersntol, as mòcht gea' en platz ausbende bou as ist gaben der Musil oder as der hòt tschrim, derbail as men geat mu men lesn en an viarerpuach ont kennen pesser ber as der ist gaben durch stiker as der hòt tschrim.

Der projekt ist kemmen gamòcht va de Claudia Marchesoni pet de bisschòf hilf van Massimo Libardi ont van Alessandro Fontanari.

De kuntshòft gamòcht ist va de Micol Cossali ont va de Valentina Miorandi.