Va mear as 30 jor s Bersntoler Kulturinstitut (schoa' Kulturinstitut Bersntol – Lusérn), de gamoa'n, de Autonome Provinz va Trea't, de Autonome Region Trentin- Sudtirol, de vraischòftn ont de gamoa'schòftn tea' òrbetn ver za lòng kennen ont versterchern der prauch va de bersntoler sproch.

De òrbetn as kemmen envire trong belln mòchen prauchen de sproch en òlla de paraichn ont iberòll en de gamoa'schòft ont lòng sa kennen tschrim aa, ont mòchen naiekaitn ver za giltn òlbe mear s bersntolerisch.

S sai kemmen gamòcht ont men ist nou noch za mòchen bisschòftsuachen ont òrbetn ver de sprochpolitik.

Men sòmmelt materialn, men nimmp au ont a toal òrbetngruppn schaung aus de problemen ont de neat as kemmen auser benn men praucht de sproch en naia sektorn, abia der sèll amministrativ.

De òrbet schauk za leing drinn òlbe mear beirter en de pònk (Projekt Beirterpònk) ont men schauk gor de nain beirter, men suacht strumentn ver za learnen ont ver za trong envire naiekaitn ver za lòng kennen.

Men tuat pasuachen, ober men tuat vil gor learnen men mòcht iberhaup kursn ont men lòk kennen de sproch ont de kultur en mearer virm: internet, television, radio, zòmmtrèffn, piacher ont kursn.

S Institut hòt mearer sitzn va museen en de eirter va de gamoa'schòft as lòng kennen en de pasuacher de òltn praich ont de sèlln va haitzegento.

En de riven ist gor der sèll za klaum au paitrog en mearer virm (za lisnen ont za schaung) ont schriftn. Bichte sai' de letratn aa. En Institut kònnt men vinnen tausnt letratn va lait, platz ont avenimentn van tol.